مصرحية ضلوع فلسطين الجريحة

السلام عليكم ..

مسرحيه بسيطه كتير بس بتعبر عن الواقع والحقائق يلي صارت لفلسطين وبناتها .. انه ما حدا تطلع على فلسطين ما حدا اهتم لفلسطين او حتى مش بس بفلسطين حتى بين البشر احيانا الاخوه بيعملو هيك بأخواتهم .. عشان تفهمو ايش قصدي اقرأوها ...

=================================


المسرحيه ..
بيسان / القدس / نهريا / عكا / حيفا / زهر تشرين / القاهرة / دمشق / المغرب العربي / الخليج / بيروت


بيسان : الوو الوو ...صباح الخير كيفك يا عكا ان شاء الله منيحة اليوم ؟؟!
اسمعي يا عكا خبري كل خواتي.. في اليوم اجتماع بعد المغرب بشوية .

عكا: اهلا اختي بيسان ... لويش الاجتماع بخصوص شو يعني ؟

بيسان : بخصوص امنا والي صار فيها .. واخوالنا الي رح يجيهن يومهن ..

عكا: طيب خيتا ، ولو انه كتر الحكي جفف قلوبنا ، كثر الدمع عمانا .
خليني اروح اكمل شغل الدار ، واسقي هالوردات واخبر البقية .

بيسان : طيب بشوفك بعد المغرب حبيبتي ، يلا سلام .

عكا : الوو نهاريا حبيبتي خبري حيفا والناصرة انو اليوم في اجتماع عند بيسان اليوم .
عازمتنا على فنجان قهوة بعد المغرب . لا تسأليني ليش لان عليي شغل خير الله رايحة اكمل شغلي .

نهاريا : طيب خيتا الله معك ، إسا بروح بقولهن .


وبعد ما اذن المغرب ...

بيسان : يا ربي وين خواتي بعدهن ما اجو ، الله يستر ما يكون صرلن شيئ ع الطريق .

طق طق طق .. خيتا بيسان يا ام محمد هياتنا وصلنا حضريلنا فنجان القهوة ..

بيسان : اهلا والله بالغاليات ،، من عيوني والله اتفضلو ..
يا نوارات الدار .

حيفا : تسلم دياتك يا بيسان والله القهوة من تحت ايديكي الها نكهة خاصة ز.

بيسان : تسلمي يا عكا ..
اسمعن يا غاليات .. جوزي قالي خبر شغلي بالي من كمن يوم .

نهاريا : خير يا ام محمد شو في ؟!!

عكا : احكي يا بيسان شو في لا تشغلي بالنا احنا كمان .

بيسان : رقن شوية واسمعن منيح ..
جوزي لما كان بمصر سمع خبر انه في واحد اسمه اسرائيل حاطط عينه على امنا ( فلسطين)
عن طمع بارضها ومالها .. وبتعرفن امي وبعد كل هالعمر بتبقى محل للطمع من قليلي الدين والحراميية ..

الناصرة : لك شو عمالك بتحكي امي تتجوز بعد هالعمر؟؟
وبعدين شو يعني ما النا راي , وغير امي امي مش راح توافق .. واالله والله يا بيسان احنا عند امي بـ 100 زلمة .

عكا : ما اختلفنا يا ناصرة .. بس بتقولك الزلمة جاي على طمع .

نهاريا : طيب وشو راي اخوالنا بالموضوع يا بيسان .

بيسان :والله ما هو هاد يلي شاغلي بالي اكتر , بقولك اخوالنا خايفين منه لانه صاحب منصب وجاه .
ومعه اسلحة كتيرة وبقولك عنه ما بيعرف الله .
يعني باختصار خايفين على بناتهم واولادهم . بتعرفن قليل الدين بعمل كل شيئ واخوالنا عندهم بنات بخافو عليهن .

نهاريا : وامي يعني مش بنتهم يا بيسان .. شوف هالحكي بالله ..
الي بتقوليه ما بيدخل عقل يعني ..

بيسان : يا ريت هالحكي يطلع كذب ومش صحيح ، بس حبيت خبركن عشان تبقى الصورة واضحة بالنسبة النا .

عكا : طيب شو رايكن نقول لامي .؟؟

بيسان : عليكي نور يا عكا عشان هيك بكرا الصبح تعالن نروح نفطر سوا عن امي ونحكيلها بالموضوع
بس ما بدنا نحكيلها عن اخوالي ورايهم لتقوم تنجلط .. ما بتعرفيها حاملي همنا من يوم ما مات ابوي !!

واياكن تجيبن سيرة لاريحا .. وغزة .. وبيت لحم .. والقدس
بتعرفهن كلهن حوامل وعندهم همهن على قدهن .. انا بس حبيت اجمعكن وقالوكن لاننا قريبات على بعض ..


وفي صباح اليوم الثاني ....

عكا : صباح الخير يا امي ...
شو عاملة فطور اليوك لبناتك يا أحلى إم ..

فلسطين : اهلين والله بحبيبة القلب عكا .. كيف حالك يا حبيبتي
وكيف بناتك واولادك ز. ان شاء الله الكل بخير؟؟

عكا : الحمد لله يا امي والله مشتاقتلك مووت .. الكل بسلم عليكي وبيحب على ايديك .. وراسك ..
شو بعدهن مش جايات خواتي ..

فلسطين : لا بس اتصلت في بيسان وقالتلي انك جايات تفطرن عندي .. قمت حضرتلكن مناقيش بزعتر وجبنة ..

عكا : تسلمي يا امي ,, هيهن اجو خواتي ... رح افتحلهن الباب ..

نهاريا : هيي يماا حطيلي اكل لسا ما افطرت .

عكا : ولك نهاريا .. سلمي علي ع القليلة .

نهاريا : ولك ريحة الام مش متل الأخت ... بعدين شفتك امبارح رايحة عندي امي ..
خدي هالولد جنني .. من امبارح وهو يعيط والله ما بعرف شو بعملو ليسكت ..

عكا : تعال يا حبيبي عند خالتك ..

الناصرة : طق طق طق .. شوفو مين جبتلكو معي .. حيفا وابنها ..
صملا عليه هالولد متل الرجال ..

فلسطين : هلا والله بحيفا وبناصرة ..
كيفكو يما .. ان شاء الله مناح ..

الناصررة : بشوفتك يما احنا مناح ..

نهاريا : تعالو مدو ايديكو ع الاكل , لحقو حالكو لاني جعانة كتير واحتمال ما خليلكو شيئ تاكلوه ..


يسلمووو دياتك على هالأكل يا امي .. والله طبيخك ما في بعدو طبيخ بهالدنيا ..

بيسان : اسمعي يا امي .. احنا هون جينا نقولك خبرية وناخد رايك فيها ..

فلسطين : احكو يا بنات شو في ؟!!!

عكا : يما سمعنا ان في واحد طالب ايديك من اخوالي .. وبقولو عنده زلمة قليل دين ..
وجاي على طمع .. شو رايك بهالحكي ؟؟؟

فلسطين : ولك يا بنت انا اتجوز بعد موت ابوكن ؟؟؟
شكلك انجنيتو يا بنات ؟؟

بيسان : بنعرفك يما ما بتقبلي .. بس بقولو عاملة مشاكل ومعند بدو اياكي ... واخوالي خايفين منه ؟؟

فلسطين : والله اموت اشرفلي من اني اتجوز بعد ابوكن ..

نهاريا : يما ادعي الله يبعده عنا .. مش ناقصنا بلاوي ؟!!

فلسطين : لا تخفن يا بنات ... احنا فلسطينيات .. وخوات رجال ما حدا بقدرلنا .. وازا خوالكو بخافو انا ما بخاف !!



بعد 4 اشهر ...

جاء اسرائيل ... وبعد خلاف من الدول العربية على قصة زواجه من فلسطين ..
قرر اسرائيل اغتصاب فلسطين ؟!!!
وكتب كتابه عليها .. من دون موافقة اهلها او حتى موافقتها ..

وهذا فعلا ما حدث ...

بيسان : يا حبيبتي يماااااا شو الي صار فيكي ..
غزة : ولكم يا خوااااالي وينكم عن امي .. مشان الله !! تعالووووو الحقوونا

القدس : الو حيفاااا ,, ولك يا حيفا شو الي صاير مش قادرة ارفع راسي من المرض وشو الي عم بسمع ..؟؟

فلسطين : يا مصيبتك يا فلسطيين ,, وعلي صار فيكي.

يا مصر ..... يا سعودية ...... يا اردن ..... يا سوريا .... يا لبنان
الحقوووني .. خرب بيتي ولكم وينكم عني

وينكم عن شرفكم ؟؟ وعرضكم ؟!!!


سعودية ... اسمعي يا فلسطين اصبري .. اقبلي فيه بهالوقت خليه يحل عنا ..
بتعرفي عنا بنات وبنخاف عليهن !!

مصر : فلسطين والله يختي مش طالع بايدي اعمل شيئ اجتمع انا واخوتك وشفنا انه ما بنقدر على هالزلمة
اقبلي بنصيبك وقدرك ....
يعني المكتوب على الجبين بتشوفو العين !!
حاولنا انا وسوريا ولبنان .. ولو تشوفي خرب بيتنا .. ومش قادرينله..

الله عليه هالظالم ..

فلسطين : ولكم انا اختكم !! مليش غيركم بهالدنيا بتسمعوني هالحكي؟؟
الله لا يخلف علي هيك رجااال ببيعو عرضهم !!!


فلسطين : اسمع يا اسرائيل شو بدك مني ؟؟
اسرائيل : بدي اجيب ولادي واحفادي هون ونضم عليتنا على بعضها .. ونعيش سوا ..
فلسطين : ملتك مش من ملتي .. وهالارض خلالي اياها ابو الاولاد عشان اورثها لبناتي واولادهن ز.
اسرائيل : بكرا بجوزو احفادي من اولاد بناتك وبنصير احلى عيلة ..
فلسطين : اسمع يا ابن الناس .. لا انا من طوبك .. ولا انت من طوبي .. حل عني وعن بناتي وسيبنا بحالنا .
اسرائيل : احنا جينا لهون .. وما في قوة بتنمعنا نرجع .. بالقوة وغصب عنك احنا باقيين هون .
فلسطين : الله عليك يا ظالم .. والله يجبرني على ناس الي تركوني .
اسرائيل : ولك انا ما بقدرلي حدا ..
فلسطين : الله عليك يا ظااالم ..
اسرائيل : انا بورجيكي وبورجي بناتك وبنات بناتك واولادهن مين هو اسرائيل الي مش مملي عينك .

فلسطين : روح بلط البحر .. شكلك ما بتعرف دم الفلسطينية ..
ولا ذقت لحمهم شيئ مرة .. لحمنا مر .. رح تندم كتير ..


>>>> اخوالي عم ببعتولنا سلامات <<<<

يااااااااا امــــــــــــــي تعي شوفي شو صار فينا .. هدمو بيتنا

عكا : ولك اغتصبو بناااااتي هاليهود ولاد الحرام ..

خربووو بيتي وبيت بناتي ..

غزة : يا عيني عليكن يا خـــــــواتي شو الي صار فينا ... تقولو عين حسدتنا وما صلت على النبي .

اريـــــحا : انا رح ابعت اولادي ليجيو والله لخليهن ولاد الحرام يندمو انهم اجو هوون .

القدس : يا بــنات .. خايفة على ابني الأقصى ... يا ويلي على حالي بعدو يا دوبه لقيناله دوا من المرض الي كان صايبو ..

يــــا ويلي ..

فلسطين : ( بأعلى صوتها ) الحقوووتي يا عالم .. ارضي وعرضي يا عااااالم الحقوووني ..

الشعوب الأخرى : الصبر يا فلسطين الصبر ..
والاغاني .. والشعارات ..

فلسطين : يا رجااااااااااال الأمة .. ما بدي اغاني وشعر .. بدي رجاااااااااااااااااال
بدي رجاااااااااااااااال

بدي رجاااااااااااااااال

وين رجالكم ...؟؟ ماتووووووووو؟؟ انعدمو؟؟؟؟؟؟؟؟ الحقوووني يا عااااااااااالم

بنااااااااتي بنااااااااااااتي الحقوووووووووهن يا رجااااااااااال الأمة !!!

وبعد البعبعة التي حصلت .. وبعد سقوط الكثير من الشهداء .. أحفاد فلسطين
ابناء غزة واريحا .. عكا ونهاريا .. القدس وتل الربيع ... بيسان .. والجليل .. والنقب وبيت لحم ..

ضحك اسرائيل ساخرا : شو يا فلسطين قلتلك يا مرأة .. الي بقف بوجهي بندم
هيهن رحن بناتك .. وازا بتضلك معندة هيك وماسكة راس ... بعمل الي ما شفتووه بحياتكو !!!

فلسطين : الله ينتقم منك يا ابن الحــرام .. ويخلصلي حقي من اخوتي ..

آآآآآآآآآآآآآآآآآآآه يا قلبي آآآآآآآآآآآآآآآآه


وبعد أن قسم اسرائيل الاراضي ..
وبعدما رمى فلسطين مع بناتها .. غزة .. اريحا ... بيت لحم ... في القسم الثاني من الأرض ..
وبعدما أغتصب عكا والناصرة وبيسان ونهاريا .. والنقب ....
عاشت فلسطين بحالة نفسية صعبة جدا ... اصبحت لا تأكل ولا تشرب ..
حزينة ..
ياسئة ..
تقتلها الحسرة على ما اصابها .. وما أصاب بناتها ..
اصبحن تتوق لرؤية بناتها اللواتي قام اسرائيل واحفادة باغتصابهن .. وقتل ازواجهن .. وهدم بيوتهن .. وتشرد ابنائهن ..


وعدا عن ذلك قام اسرائيل الرجل الظالم .. بتغيير اسماء بعض بنات فلسطين المغتصبات ..

اصبحت بيسان – بيت شان .

تل الربيع – تل ابيب .

عكا – عكو .

وغيرها الكثير ....


غير اللغة الالزامية ... التي اصبحت اللغة الرسمية التي يجب ان يتحدث بها الفلسطينيون ..

ومرت ايام .. اشهر ... سنين

ومازالت تذرف فلسطين الدموع .. وما زال يسقط منها الشهداء ..

وفي احدى الايام .. سمعت عكا خبر زواج احدى بنات خالها في مصر ..
فعرضت قصة الذهاب الى مصر بحجة حضور الزفاف .. لكي ترى غزة واريحا وتعرف أخبار أمها الحبيبة فلسطين ..

وهذا ما حدث فعلا ..

حضرت بيسان , الناصرة , عكا ,, نهاريا , يافا ,,, للسفر ..
مع بعض من بناتهن الفلسطينيات الأصل ( الاسرائيلية على الهوية ) ...


عكا : والله يا بيسان مش مصدقة ايمتا بدنا نوصل لمصر
قلبي مشتاق لاشوف خواتي واخبارهن ....

الناصرة : اسكت يا شفاعمر !! خليني اسمع خالتك شو بتحكي ..
وانا والله يا خيتي .. مشتاقة لامي .. انا اصلا مش جاي محبة باخوالي .
والله لولا العيب والحيا كان تبريت منهم .. ولك ما اتطلعو عليها
بس شو بدنا نعمل بقولو اولادهم مناح .. بلكي طلعو اولاد اخوالنا وبناتهم احسن منهم ..


حيفا : خلص اسكت هينا وصلنا خلونا عندهم وما بدنا نعاتب حدا ولا شيئ
حقنا بالآخر برجعلنا .. بايدنا وبايد اولادنا
وبالناقص عن اخوالنا كلهن .. كبيرهو وصغيرهم ما بدنا شيئ منهم ..
احنا جايات نطمن على امنا وخواتنا واولادهن ..


يالله انزلن ..


غزة: ولك يا أريـــــــــحا مش هاي الي جاي حيفا ولك مين الي بحدها
شكلها هاي بنتها الي كانت على ايدها يوم الحرب .

اريحا : صملا عليها زهر تشرين !! معقول صارت صبية وكبيرة !!

غزة : ليش يا اريحا هو امبارح صارت الحرب ...!! صرلها سنين
الله يقطع اليهود واولادهم وذريتهم ..

حيفا .. خـــــــــــواتي حبيبات قلبي آآآآآآآآآىه صرلي زمن مني شايفتكوو طمنوني عن اولادكو وعن امي
امي كيف احوالها؟؟ وشو صار فيها؟؟بتسأل عنا؟ بتحكي عنا ؟؟ خبروني

نهاريا , عكا , بيسان : يا حـــــــسرتي يا خواتي تعالن بحضني تعلن شو الي صار فينا وقطعنا هيك
صار بدنا نسافر كل هالمسافات عشان نجتمع سوا ..

والله راحت ايام الزعتر والشاي ...راحت ايام الليوم والملح ..
وايام الزتون..

اريحا : ولك يا حيفا قوليلنا مين هالصبية الي معك !!

حيفا : زهر تشرين يا حبيبتي هدول خالاتك ..

وهدلاك الي جايين قبالنا اولاد اخوالي انا سلمي عليهم .

زهر تشرين . "بسيدر" – بالعبري – ( معناها طيب ) ..

حيفا : قلتلك يا بنت لا تحكي عبري هون .

زهر تشرين : هو بايدي يا امي .. ما احنا بنحكي هيك وتعودنا .


اسكندرية , دمشق , بيروت , بحرين ، قطر : مين هالبنت الي ماشية تلانا ؟؟
اريحا : هاي بنت حيفا ... زهر تشرين ...

زهر تشرين : مرحبا .
اسكندرية , دمشق , بيروت , بحرين , قطر : ( بصوت منخفض ) .
اسكندرية : يعني زهر تشرين ,, يهودية ولا عربية انا عايزة؟
دمشق : ولك هدول من فلسطين ,, بس عاشو مع يهود
البحرين : لا حول ولا قوة الا بالله ....انا اشوف هالبنية يهودية
اعوذ بالله وش هذا ؟ يهود بديارنا ؟
بيروت : هيدولي متل اولاد غزة واريحا مالكو شو القصة؟
اسكندرية: بس دول يا بيروت بيتكلمو عبري .. ومعاه جواز سفر اسرائيلي
يعني دوول يهود مش عرب
دمشق : معقولي هالحكي يا صبايا ؟
تعو لنسأل مين؟
يلا نسأل عمتنا غزة؟؟
لالا بنسأل عمتو حيفا من مرة ز. الجواب عندها اكيد 100%
عمتي حيفا ,عمتي حيفا
نعم يا عمتي شو بدكم خير؟
انتو يهود ولا عرب !!!!!!!!!
حيفا : مــــــــــــــــعقول بتسالكو هيك
ولك الحق مش عليكو ... على أهلكوووو على كباركم ..
عم تسئلو هيك سؤال ولكو نحنا فلسطينين ومنبقى فلسطينين وين ما رحنا منضل فلسطينيه ولو طلعنا علقمر .

المسرحيه لسا ما اكتلمت كلها ان شاء الله قريب بتكون كلها ...

تحياتي